Archieven

21 Jan Wuenss van Littoijen belooft Jan van Lent heer Janss scadeloes ende costeloes te halden als van anderhalven karolus gulden jaerlix te betalen aen Jan Aert Schelenss ende dat gheloeft Jan Wuenss voers die 1½ gulden voers afteleggen met den dorden pacht ende met den aftersteeden pacht daer bij. Testes Peter Lambertss ende Jan Lamberts.

22 Jan Cornelissoen verkoopt alle sijn ghereede guedens dij hij deeser tijt heeft Bieken Hanrick Ghijben soen voer die summe van 29 gulden ende Jan Corneliss gheloeft Bieken voers dat voers goet te leveren op verbintenisse van alle sijn erf guedens. Testes Peter Lamberts ende Jan Lambertss.

23 Jan Corneliss heeft overgheven ende hem verbonden dat hij Jenneken sijn twede huijsvrou haer erf guedens niet en sal vercopen noch en sal belasten noch ende sal beeswaren binnen den tijt van 3 jaren naest een volghende het en sij met consent ende wil van haren brueders Bieken ende Dierck ghenampt dat die daer toe souden helpen. Testes Peter Lambertss ende Jan Lambertss.

24 Meeus Janss verkoopt Hanrick Robben tot Kessel 2½ gulden jaerlix pachs van ende wt seven hont lans in Lit ter plaetsen gheheijten die crom, belendingen: Gort Schelen; die erfgenamen van Reijnder Gheritss; die ghemeijn steghe; Lambert Bogers erfgenamen ende noch wt den halven Naten camp op die Lithsche beemden, belendingen: Lambert Ghijb Huijgen; Hanrick van Maren met meer anderen; dat cort steechsken; des abs camp; altijt te betalen op corsdach. Te lossen met 40 karolus gulden ende dat nae verloep van 6 jaren ende een jaer te voren op te seggen ende Hanrick Robben voers macht oeck een jaer te voren op seggen ende dan is Meeus verbonden af te leggen ende in dien dat soe niet en ghevelt soe sal den voers pacht noch 6 jaer staen ende hier teghen sal Hanrick Robben hebben ende ghebruken 3½ hont lans liggende in die prochi van Kessel ter plaetsen geheiten Herman van Deventers camp, welcke 3½ hont Hanrick Robben voers ghebruijcken sal als voers is den tijt van 6 jaeren of 12 jaeren ende elck met een jaer te voren op te seggen, ende Meeus voers gheloeft Hanrick voers den scoef vrij op ende af te leveren ende Hanrick voers sal die leij betalen ende voert commer binnen slands waren ende oft saeck waer dat Meeussen huijsvrou van leven ter doot quaem soe sal Meeus voers Hanrick Robben bij goij man seggen betalen het geen hij dit lant verbetert hadde. Testes Peter Lambertss ende Jan Lambertss.