Archieven

5 Peter Hanrick Lambertss belooft te betalen Willem Janssoen van Os sijn swager die summe van 21 gulden ende een malder roggen nu op Sunte Jan Baptisssten dach geboerten toecomende. Voer scepenen Peter Lambertss ende Jan Lambertss.

6 Jan Gosen Willemss maeckt sijn testament ende vutersten wil noch goet weesende van verstant. Hij maeckt Suncte Lambrecht sijnen pateroen enen stuver eens te gheeven. Item maeckt noch hi testatuer voers Peterken sijnre huijsvrouwen huijs ende hof daer hi deeser tijt in wonende is ende alles gheens hi macht over heeft ghereet ende onghereet vutghenomen anderhalf hont lans in die hoeven die maeckt hij Marija sijnre dochter ende dat van rechter aelmissen om Godts wil is maeckt noch hi testatuer voers Marija sijnre dochter sijnen rock om daer mede ghecleet te vuerden ende dat als boven is verhaelt. Item Jan voers vil nende beescrijt dat sijn vrienden ofte die hem vermeeten vrienden sijn erfghenamen te wesen dat sij mogen comen aenveerden sijn guedens in dien sij Peterken voers ghelooven bijnnen jaers af te leggen een malder terwen aen Jan Wilms ende een malder roggen tot Maren dien hi testatuer vut Peterken sijnre huijsvrouwen hofstadt ghevest ende opgheworven heeft met den aftersteeden pacht ende dat sij erfgenamen Peterken voers noech moeten gheloeven te betalen bijnnen jaers 15 karolus gulden ende alnoch die coe ende een bedde die sij mede sal neemen. Item ofter iemant waer die vermeeten sijn erfgenamen te sijn ende met deesen testament ofte instrument nie te vreeden en wolde sijn dien selven maeckt hi testuer voers elcken enen auwen groete toernois oft die gerechte weerde daer voer ende daer mede vut alle sijn guedens ghesceijden ende af beeroeft te wesen. Item Peterken sijn huijsvrou maeckt Jannen haren man voers alle haer guedens in alsulker manieren als boven ghescreven is indien hi die lanst levende blijft. Hier sijn bij en overghestaen Jan Aert Schelen ende Jan Lamberts als schepen.

7 Jan Ghosen Willems heeft afghenomen Claes Ghijbens 21 stuver eerfs pachts ende geloefde die te gelden nu ende ten ewijgen daghen dat Claes Ghijben ofte sijnen erven daer scaij noch hijnder af en sal ghecrijgen op hem ende alle sijn guedens nu deser tijt hebbende of hier nae maels vercrijgende. Testes Peter Lambertss ende Jan Lamberts.

8 Meeus Jans belooft te betalen Hanrick Tomaess die summe van 12 gulden op Sunt Jacobs dach toecomende. Testes Jan Aertss ende Jan Lambertss als scepen.