Archieven

9 Willem Aert Janss voer hem selven ende voer IJewen IJewenss ende Peter Elijss, Matijs Goertss, Jan Aertss die Weert beloven Wijn Wouterss ende Ghijsbrecht Peterss die summe van 70 carolus gulden tsamen met den oncosten die daer op gelopen sijn ende alnoch op lopen mochten acht daghen voer suncte Marten naestcomende te betalen. Anno 67. Testes Peter Lambertss ende Jan Lambertss.

10 In manieren ende formen hier nae bescreven soe wil vercopen Gherit Hanrick Gheritss 2 merghen lants ende 3 quartier ofte daer omtrent liggende int ghericht van Herwaerden ter plaetssen gheheijten die hoge bergen een stuck uter werts met sijnen toebehoerte op dat wertgen met sijnen aenwas ende affal asloe dat is lopende, belendingen: die kere van Herwaerden; den heschen ham; die stroem mase ende dat voers wertken. Item die voers vercoper wil dit voers goet vrij vercopen ende vesten sonder wtghenomen heren gelden seettingen ofte anderen onraet van ghebuerlike rechten tot den selven lant behorende ende wil dat voers goet vesten met alsulcke brieve als hi dat vercregen heeft ende gheloven den coper van desen allen voercommer gehelic afte doen ende daer op vertijen tot behoef den coper van desen. Item die voers vercoper wil ende bescheit dit voers goet ierst te ghebruijken desen somer naestcomende ende als dan den coper ierst aen te veerden. Item die voers vercoper wil dit voers goet dach dach gheven te weten te Bamis naest comende over een jaer te betalen die een helft vander sommen die dit voers goet gelden sal ende die ander heelft Bamis daer naest volghende sonder arch oft liste. Item die voors vercoper wil dit voers goet vercopen met carolus gulden of 20 stuver voer elcken gulden te rekenen of paijment van ghelde dat daer goet voer is. Item soe wil dit voers goet in coep behaut die sal den coper van desen gheloven te betalen voer schepenen van Herwaerden ende dat als het huechsel vut is ghegaen sonder teghen segge. Item die voers vercoper set elcken sclach diemen op die voers goet sal sclael te wesen enen gulden gelt als voers is enen half voer den coper enen half voer den vercoper nae voerwaerden recht.

11 Alsulken hosstat lans daer Gijsbert heer Jan van Lents s. in bestorven is daer heeft Jan Aertss van Tvuijl aen gericht voer enen philippus gulden jaerlix nae inhalt sijnre brieven ende die wete ghedaen soe recht is soe maende die scoltet den scepenen in enen vonnis hoe Jan voers dat onderpant sal comen te slijten met recht soe wijsden die scepen voer recht dat Jan voers den vorster inder kercken van Lith soude doen verbieden 3 14 dagen ofte 6 sondagen ende die coepdach te stellen soe recht is. Item dit goet voers heeft sijn vol gebodene gehadt in der kercken van Lijt ende den coop dach gesedt op den 29 dach november anno 61 soe maende die scoltet Crijn Lamberts den scepenen in enen vonnis wees boert voer recht wesen soude soe wijsden die scepen voer recht dat die heer vercopen soude den scoensten copman die hi gecrijgen conde ende want niemant onderstaen en woude ende den Philippus gulden jaerlix met den aftersteeden pacht betalen en woude met den scaij van rechten, soe riept die heer wt tot negen jaerscaeren toe ende doent noch niemant onderstaen en wilde, soe heeftet die scoltet vercoft met brandender carss nae percken recht ende Jan van Tvuijl is bevonden den scoensten coopman die hi gecrijgen conde ende heeft den coop voer 31 gulden ten huijse Baet van Bijlant naedemael Jan van Tvuijl den coep bleven was soe maende die scoltet den scepenen in enen vonnis wes voert voer recht wesen soude, soe wijsden die schepenen voer recht datme den bruijker den aenvanck verbieden soude ende sijn hant daer af te trecken opten dorden dach ter tijt toe Jan voers en waer vernuecht, ende doent ten Bosch ter paijen af roepen ende in twe die naeste dorpen boven ende beneden Jan van Twijl beegerde des goets weer soe maende die scoltet den schepenen in enen vonnis wie des voers goets een weer sijn soude

12 [begin akte ontbreekt?] Het huechsel sal wutgaen dijnsdach over 14 dagen. Dat insetten van Peter Hanricks is 75 gulden hier op Peter gheschagen 5 sclegen elcken sclach 2 gulden half ende half. Noch Willem Peterss 2 scleghen. Noch Hanrick Hack 2 scleghen. Een ton biers te wijncop buten des vercopers scade. [ervoor in marge: Lambert Willem Raetsen vercoper] Item inden iersten gereet 20 gulden als het huechsel vut gaet met wijncop ende sclachgelt. Ende die ander summe te bamis naestcomende. In dat smal huesken boven naest Peter Hanrick Robben ende beneden naest Willem Peterss. Voer schepenen van Lit ofte Kessel soe den vercoper dat gelieve sal.