Archieven

2 Heer Jan Henricss van Lent ende Peter Goertss als kercmeistren van Littoeijen verkopen de erfgenamen van Geertruijt Becken een stuck lantz in Littoijen inden Erssetel 4½ hont groot wesende met consent des archidiakens ende den gemeijnen nabueren, welcke stuc lantz Geertruijt Becken voers eertijts der voers kercken gemaeict hadde als dat volcomelijc blijct bijden memorij boecke. Met conditien toegedaen dat die voers erfgenamen jairlijcx dair vuijt betalen sullen des dijnsdaechs nae die octave van pincxten een half pont paijment wair af de pastoir sal hebben die twee deelen ende die custe dat dordendeel ende alnoch den pastoir voers jairlijcx 3 stuver min ort ende den custer voers 2 stuver min ort verschijnende jairlijcx des anderen daechs nae Littoijer kersmis dach als dat memorij boec voers volcomelijc begrijpende is. Testes Claes Janss ende Reijner soen wijlen Jan Clinge.