Archieven

1 het overgeven bij Gelinck Goertss van het leengoet.
Alzoe Gelinck Goertss als oudtsten zoen wijlen Goert Arienss verweeckt bij Jenneken sijnder witteige huijsvrouwe op 24-11-1591 heeft geconsenteert ende overgegeven in presentie ende met consent van Jenneken sijnder moeder dat haer leengoet onder haer susteren ende broeders soude gesplet ende gedeijlt worden, gelijck alle andere haere goederen, soe is nu wederom den voors Gelinck op date van deesen voer schepenen van Geffen ende leenmannen hier ondergescreven tot meerder versekeringe ende vastichet in sijn eijghen proprie paersoen gecompaereert ende geeft hem selven alnoch hier in over en consenteert alnoch midts deesen als voer, met alsulcke clausule toe gevoecht, dat sijn andere susteren ende broeder hem toe vuegen, met dijen hij Gelinck sijn vordeel overgeeft, tot een bekentenisse, een mudde rogge eens in den sack wijten generaelen mast van het gewas, tegenwordich gesaeijdt wesende, item offt gebuerde dat enich van sijn susteren ende broeder quaemen te houden sonder raet ofte behoerlijcke consent, van hem Gelinck als overhoefft met Peter Rijcken haer oem ende andere goede vrinden, soe sal Gelinck voors die portie van den selven die die mochte wesen, wederom aen sij selven hauden ende nemen, item alnoch wordt hier geconsenteert ende overgeven bij den vorss Gelinck met sijnen anderen broeder ende susters, dat Katarina haer suster die vlas tiende vrij ende vranck voer vijt sal hebben, soe lange als sij ongehoudt blijft het sij in geestelijcke ofte in werlijcke staet; allet sonder arch ofte list.
Actum den …ten dach der maent meert anno 1597 in presentie ende bij wesen Peter Rijcken ende Jan Bartholomeus schepen ende den voors Jan Bartholomeus ende met Jacop Jacops als leenmannen, als getuijgen daer specialijcken toe versoecht ende gebeden, die het selffste beneffe die partijen hebben ondertekent, welcke partijen geloeven wes vorss is, alsoe het selffste te onderhouden ende volbrengen,