Archieven

1 Erffdeijling der erfgenamen Derick Bernts. Hilleken Derick Berntss cum tutore die thochte welck sij seide te hebben ofte huer van … wegen bequam inden erffgueden huer van Dericken voors hueren wittigen man in sijnre tit achtergelaeten sijnde, dair heft sij hair selven in doet gemaect en heeft die overgegeven Jannen, Bernden ende Gijben Huijgen man Lijsse sijnre huijsvrouwe hueren wittigen kijndereen ende oeck Dericks voors erfgenaemen tot eenre mijndelicken gelicken erffdeijlijnge tusschen hen drien voors, ende ock mitten kijnderen van Webbe huerse dochter bij hueren levende lijve te maken; en heeft daer helmelinge op vertegen, beheltelick wtgenoemen het virde loet dwelck de wittige kijnderen Webbe voors dair aff inden voers deilijnge metten lot te deel gevelt dat besceijt sij Hilleke voers dair wil sij huer tochte in behauden ende huer leven lanck dat selff gebrueken tan wil sij huerse dochter kijndren voors dair wats goet aff bewijsen ende doen dat mach sij bij hoer selven noch wel doen. Testes Hanrick Clijng, Rut Dericx, Goert van Maeren ende Peter Janss.

2 Alsoe Jan van Zambeeck ons scout, Bernt sijn brueder ende Gijb Hugen man Lijsse sijns wijffs wittige kijnder van Derick Berns een erfdeijlinge begherden inde erfgoeden die hem competerende ende hem van hoeren vader voirs aengestorven sijn, soe hebben de scepen voers geestimert ende in hoeren handen genoemen om die nu gelick voer dien drijen voors hoer part ende oeck naemaels voer den kijnderen van Laemert Huijgenss ende Webbe oeck een dochter Dirick Berns voors voer hoer part ende aengedeelt gedeilt solde blijven ende aleer sij totten principael erfdeilijnge quaemen ende het erf ende goet welck Derick Berns voors Bernden sijnen soen in hillichscher voerwairde mede gegeven had dat en sach Bernt voirs nijet lichtelick weer in toebrengen om sijn versceien kijnder wil; ende des gelix soe Laembert voors van sijne ende Webbe voirs kijnder wege niet tegenwoerdich en was ende sijn hilix goet dat hem Derick voors mit Webbe sijn dochter gaff ock niet mede innebracht, soe hebben sij scepen den anderen elcken daer soe veel teegen geordinirt ende mit den loth te werpen toegescict die welck die scepenen gemackt hebben ende die scouth als die heer doen gewoerpen heft; item Bernts hijlix goet 3 mergen lants op die Cleijn beemden; item 3 mergen in die cleijn tweeuelen ende enen mergen opte cort weijen her tegen het irste loth voerden scouth voors anderhalven mergen lants in Box camp een mergen op die nodenste weijen, 5 hont in die overste hoeven, eenen mergen in die campelaeren, enen camp van 2½ mergen aen die wetterijnge ende enen halven mergen op die langweijen aen die overste steege ende enen guldne jairpachs aen Gerit Daemens; dair teegen Gijb Hugen loth anderhalven mergen lants indie langbemden, 4 hont lants in die crichaem, 5 hont lants in Martens hoeff, 2½ mergen in Rente camp, 10½ hont inde nederste hoeve ende enen halven mergen lants opte westerackeren;

3 Jan van Sambeck scouth ende Bernt sijn broder ende Gijb Hugen voors beloven Hillicken Derick Bernts huer moeder 18 rijnsgulden, een ijgelick van hen 6 der gelickker gulden ende die inde vir korsheilich dage te betaelen vair van den ersten taeldach wesen sal nu in die vir korsheilichge dagen voors naestcomende over een jaer ende soe vort alle iaer soe lang als sij Hillicken voers leeven sal ende daer en teijnden nijet langer als voer die tochte die sij tot huertse behoef afgestaen ende hen luijden nu overgegeven heeft.

4 Een scheijding tussen Lambert Hugen ende den erfgenamen Derick Berns ende den scepenen van Groet Lith. Als vander erffdeijlijng die geboert is tussen de erffgenaemen Derick Berns toe weten Jan van Sambeeck scoltz, Bernt Derickx, Gijg Hugen ende Lambert Hugen, soe als die scepen dat gesceijen, gedeilt ende geloet hebben, soe sullen die loeten dat argier ofte nijet soe goet en waer als die anderen sullen die gebroders ende susters nae den doet van Hilliken Derick Berns dat setten ende stellen in handen van 4 ompartielicker goeder witteechtichger mannen die sij daer toe kijsen ende setten sullen om die 4 loeten effen goet toe maeken soe sij dat het alrebeste loeten ende setten sullen ompartielicke den vir gebroders ende erffgenamen van Derick Berns. (1) Des sal Lambert Hugen van stonden aen aenfangen enen mergen lants op die cort weijen van sijnen gedelt ende loet ende sal den selven mergen lants nae doet van Hillicken Derick Berns laeten int selven loet van den kijnderen van Webben horre moder ende Lambert en sal den selven mergen ock nijet verargeren met beeteren toe behoff van sijnen kijnderen als voers is. Dits betugt voer scepen Hanrick Clijng, Gaert van Maeren, Peter van Hees Janss ende Udo Gaerts. Item bijwesen Hugen Gisbert Gaert Hugen ende heer Jan van Lent Hanricx die hir bij ende aen gewest als dit bediengt is ende overgegeven met meer goder mannen.