Archieven

1 Protocolle int beghintsel vanden jaer 48 den 22ten dach meij. Wij schepen: Peter Janss; Willem Hanriecks; Bent Diercx; Jan Aert Zelenss; Lambert Huijghen; Peter Lamberts; Udo Geritss als notaris.

2 Voer scepen Peter Ianss, Bernt Diercss, Willem Mercelis, Lambert Huijghenss, Jan Arts ende Peter Lamberts. Tuijgen voer ons comen is heer Peter Zeelenss ende heft gepacht vanden schoutent Art van Sambeck inder tijt sijnd ende vanden scepen vors ende van Art van Reeck Willem Goess Wielmss ende Lambert Reijnderss ende Imbert Janss als gesuoren ende Ghijb Huijgenss mit Bernt Diercx als hellijgen geest meesters ende Peter Gerit Ghijben ende Dierck Ghisberts als kerck meesters mitten gemijnen naburen hebben eendrechtelicken verpacht heer Peter Zeel Ghisbertss den dick bij Ghij Keeris 6 jaer lanck durrende nae den anderen sonder middelt daerin ende aen toe vangen tot Sintte Martens dach anno 49 ende mede soe ist bescheiden die desen dick pacht dat hij gehauden ende verbonden sijn sal dieen dick allen jaer toe maken ende die schau daer oever te leveren gelijck als die scepen den dick koerren ende opten wijnter daer op den dick toe sijn ende toe sien gelijck of hij hem selver toe hoerden in water noden mit stro ende stake daer op te weten; item noch soe bescheiden desen verpechters die desen dick pacht dat hij allen jaer sal betalen aen Peter van Oerl 15 gulden ende daer quijtancien af brengen allen jaer aen den scepen van Lith ende wat meer ghilt boven die 15 gulden dat sullen sij betalen aen dorp van Lith. ERONDER: item dit heft heer Peter Zelenss gepacht voer 16 gulden ende den wijncop buijten hoeren schaij enen gulden ende den scriver eenen snaphaen.

3 Voer scepen Peter Janss ende Lambert Huijgens. Tuijgen dat voer ons gecomen sijn de kijnderen van Otto Diercx van Bijlant die hij bij Elijzabeth sijnder huijsvraue verweckt, sijnde Aelken, Agnees, Dierck ende Heilken, met hoerne gecoren momber ende hebben daer eendrechtliken over gegeven dat Otto desen pacht van 8 gulden ende 10 stuvers jaers dwelck Jan van Sambeke den kijnderen geldenden is siaers dat Ot die gebruijcken manen ende boeren sal alsoe lange als hij in den leven is; item oft sake waer dat Jan van Sambeke dese voers pacht affleden ende quijten dat als dan Ot die penningen schuldich is weder toe beleggen tot reent ofte toe pacht tot den voers kijnderen behoef Alken, Agnees, Dierck ende Heilken ende Otto te gebruijcken sijn leven lanck ende na doot van Otto dan te succederen ende comen opten kijnderen voers, mede soe geloveden dese voers kijnderen metten mombers dit overgeven vael vast ende stedich hauuen sullen op hoer ende alle hoer goet hebbende ende vercrigende.

4 Voer scepen Jan Art Zelenss ende Willem Hanricks. Dierck Dierckss, Jan Diercxss, Willem Diercxss, Adriaen Diercxs ende Joachim Diercxs ende Jan Diercxs die oem als wittige momber der voers kijnderen zalijger Dierck Danielss, ende die mundige kijnderen Dierck ende Jan mitten momber die geloven voer die onmundige kijnderen; die verkopen Peter Janss kijnderen die hij bij Catelijnen sijn huijsvrau verweckt heft Jan Zeelen dochter, een hostat landts in Groot Lith aen die leege after straet, belendingen: Ghijb Roevers erfgenamen; Lambert Reijnderss inden Boegaert; de strate; dorpsgraft.