Archieven

1 Reijder Gosen Bogerss belooft Aert Bauwenss scadeloes ende costeloes te halden als van enen half malder teruwen dat Aert voers gheldende is Heilken Hanrick Thomas dochter ende wat verschenen is sal Aert voers betaelen tot desen dacht toe ende wat Suncte Marten toecommende verschinen sal dat sal Reijder voers betalen ende mede ist voerwaert dat Reijnder voers is verbonden ende moet af leggen van Suncte Marten toecomende over twee jaren. Testes Peter Lamberts ende Jan Lamberts. ERONDER: item noch gheloeft Reijnder boven ghescreven Aerden voers Sunte Antonis naestcomende te gheven ende te betalen die summe van 3 gulden ende 15 stuver op datum als boven ende voer die selve schepen.

2 Agnes wedue Hanrick die Smits een echte dochter van Reijnder Ghoessens inden Bogaert ende Wiendel sijn huijsvrouw heeft ghegeven ende ghemaeckt Arijken haer wittige dochter die sij Angees bij Hanrick Janss die Smit wittelick verweckt heeft eens die summe van 50 gulden wt alsulcken ghedeelte weijlants als Agnees voers heeft liggende in Lit over die Maese ter plaetssen geheijten Bogers weert, belendingen: den Staert; den jongen Dierck Aertss; dat Arijken voers die 50 gulden voers vrij voer wt sal bueren ende dat doer oersaeck dat Jan Ghijben ende Willem Goerts van Lent van Engelken wedue Jan die Smits ock hebben gehaelt een seker summe van penningen als si seijde ende die 50 gulden voers sal Arijken aenveerden alsoe geringe als Agnees haer moeder deser werelt over leden is. Testes Peter Lambertss ende Jan Lambertss. Akte doorgehaald.

3 Goert Jacobssoen inden Bogaert betaalt Heijlken Wdo Gherit Storms doch[ter] die summe van 24 gulden van pixten naest commende over een jaer ende sedt daer onder te waerborch sijnen acker op die ackeren aen die Litsche wijnt muelen, belendingen: Alaert Storm; die erm van Lit met meer anderen; mede gheloeft Goert voers Heijlken voers een mudt roggen Bossche maet te betaelen op corsdach naestcomende. Voer schepen Peter Lambertss, Jan Lambertss ende Jan Reijnderss.

4 Jan Corneliss verkoopt een malder terwen Jan Janss scoltus van Kessel jaerlix paschs Bossche mate ende tot Lit te leveren van ende vut enen acker laents liggende in die herlickheit van Lit ter plaetssen geheijten die Hoge Hoeven, belendingen: Dierck Arijaenss; Aert Maerschalisse; den hogen tientwech; Lijsken Willem Marchelis overleden wedue; welcke malder terwen sal verschijnen op Sunte Martens dach naestcomende ende soe voert alle jaer op den ghelijcken daech; ende Hanrick Hanrickss set ende stelt tot enen onderpande vier hont lants in die voers heerlijckheit, belendingen: Quijrijn Lamberts; den langen camp; den afftersten Petercamp. Testes Peter Lambertss ende Jan Lambertss. ERONDER: Jan Janss scoltus van Kessel bekent Jan Corneliss een los in dat voors malder weits dat hit altijt mach lossen ende quijten tot sijnen scoenssten met 27 der ghelijker gulden ende met den aftersteeden pacht daer op Suncte Martens dach anno 66. ERONDER: Het is ghecomen Jan Corneliss ende heeft geloeft Hanrick Hanrickss sijnen svuaeger scadeloes ende costeloes te halden als van alsulken malder terwen als Hanrick Hanrickss hem verbonden heeft aen Jan Janss scoltus van Kessel.