Archieven

1 Op huijden den 23 april op Sint Joeris dach soe hebben die gemeijn aude schuts in bier verteert 70 cruijs. Op huijden den 24 april des anderen daechs nae Sint Joris soe hebben die gemeijn aude schuts in bier verteert 84 cruijs. Op sondach nae Sint Joeris opten 28 april soe hebben die vier dekens met mer andere schuts met Aelken Luijcas aft gerekent van bier ende oeck metter maeltijt dat wij op Sint Joeris dach daer ende des anderen daechs daer nae op datum als boven verteert hebben hebben soe blijven die schuts Aelken schuldich 24 stuivers een oert st.; die buijten luijden gelach is al mede aff gerekent.

2 Rutger Janss ende Claes Gijsbertss als mombers vande ombejaerden soene wijlen Gijsbert Gerit van Best Gijsbertss verkopen Hanrick Reijnderss onsen mede schepen 2½ hont lands opte dwergaerden, belendingen: Elijsabeth Jacop vander Vorst aen beijden sijden; de steech acker; Hanrick Reijndersz voors. Hieruit te onderhouden 14 voet maesdijck inden nijen dijck. Datum anno 64 den 10 dach mert stijlo Luijdick. Jan Aertss ende Hanrick Gieliss.

3 Jan van Heeze Janss verkoopt Goessen Janss sijnen soene anderhalff hont lants ter plaetsse genoempt affter die hoeff, belendingen: den maesdijck; Jan Corneliss; Jorijaen Hanrickss; den Hamdijck. Testes Peter Lambertss ende Hanrick Reijnderss. ERONDER: Ende Jan van Heze Janss die bedancken van Goessn sijn soen vande voors lant goeder betaelinge. Testes et datum ut supra. ERONDER: Want het tselve vander betaelinge als boven is geschiet voer scholtent ende schepenen voers met mer ander goeder mannen aldaer bij geseten opten dagen als voers is.

4 Jan van Heeze Janss aut omtrent 80 tuijcht ende verclaert op sijnen edt dat hem wel kendelijcken is ende oeck waer is hoe dat enen tijt geleden is dat Jan voers gedijent heeft inden naem vanden heren van Sint Lamberts als vorster inder tijt tot Lith dat hij Jan voors wt beveel vanden scholtent inder tijt gedaecht heeft Jan Janss van Lent om momber te sijn van die onmundigen kijnderen wijlen Hanrick Gijben Coster sijns broeders kijnderen inder tijt ende want Jan van Heez vorster den voerg. Jan van Lent ens twemael oft drie mael gedaecht heeft op enen peen van 50 roesen noebel rest ende voer al eer Jan Janss van Lent hem totter momberschap heeft willen voegen ende het tselve momberschap aen heeft willen verden. Testes et datum ut supra.