Archieven

140a [Vervolg akte] Ghijesbert Wouters 250 gulden soe in teeringhe als gestoellen
Ghijebert Jan Ghijben 300 gulden
[beloopt 627 gulden]
Summa int geheel 8705 gulden 17 st.

141 Gheeft in alder oetmoet te kennen heer Ariaen Kepken Artss priestere uve goetwielleghe ondersaet ende ingeseten des doerps ende heerlickheijt van Gheeffen hoe dat hij suppleant is mumber geseet van die onbejaerden kijnderen van Rembout Artss sijns broeder kijnder ende van zijn administratie ontfanck ende wijtgheven heeft hij suppleant gedaen sufficiente rekenscap voer schoeltes ende schepenen deeser bancken in presencie van pertijen van beijde zijden vanden vercoefte goeden moebele ende immobele bij Reijmboutden achtergelaeten ende inder zeelver rekenscappen is bevonden dat hij suppleant mer wijt heeft gegheven van zijns seelffs gheelde dan vanden vercoeften eerff 374 gulden, alsoe dat hij supleant ter oersaken van dieen heeft gewerffven ofte op jaergheelt gehaelt aen Sijken Brienen 100 gulden ende aen die eerm van Gheeffen 50 gulden daer hij suppleant jaerlix aff moet betaellen 9 gulden al tot geote laste schade ende groet verdriet des suppleants ende noch mer zij soude inne soe verre hij suppleant daer nijet op versien en woirde van uver behoerliken provisien, soe eest dat hij suppleant aen u eer. vriendelick is begherende dat ghij hoem wielt accorderen dat hij sijn wijtgelechde pengnijggen voer sijns broeder kijnder mach intenteren aen die goedens sijns broeders die noch onvercoeft zijn doen veijllen op zijnen behoerliken tijt ende vercoepen ten hoechten ende schoensten prijse om zijn 9 gulden ofte 150 gulden daer meede te moegen loessen ende acquiten alsoe dat van goedts ende rechts weegen behoert te geschijeden, want hij supleant als voel luijden kendelick is heeft die scult vanden onmundeger kijnden vaders weegen moeten betaellen ende eenen wal en sals hij suppleant nijt doen met 300 gulden die hij suppleant boeven die 150 gulden van sijns selffs gheelde heeft gedebursert ende inne sijns broeders scult gebrocht.
Bidt daer omme oetmoedelick etc.

142 Eijmbert Peters Deelis Bartholomeus Joest Thomass Ghijesbert Jan Ghijben schepenen in Gheeffen tuijgen ende certifficeren voer die gerechte waerheijt dat op huijden datum van deesen voir ons gecompareert zijn in hennen properen persoenen Rutgher Hanrixss ende Ghijesbert Wouterss onsse meede schepenen ende Wouter Broess oudt ontrent 29 ofte 30 jaren van Jacop Peterss schoeltes tot Gheeffen gedacht ende nae gewoenten geeijdt, tuijgen op haer eede die zij deeden int aenvangen van honnen schependumme ende Wouter Broes tuijcht op zijnen eedt op zeekere intergatorien hoem van weegen Jan Jan Sijmonss van Lijt, Wiellem Janss van Lijt ende Anneken haer suester altesamen wijttege kijnderen van Jan Sijmonss van Lijt vervecht bij [niet ingevuld] zijn huijsvrou een wijttege dochter van Jan Jacopss ende tuijgen eendrechteliken dat der kijnder goeden onder Gheeffen geleegen te weeten huijs ende noch verscheijde parcelen van eckerlant ende weijlant ende 2 mergen brocklans onder Littoeijen geleegen ende noch die heelft van 4½ hont onder Littoeijen geleegen veel beeter ende proeffteliker vercoeft sijn dan verpacht ende bij nae noch soe veel int vercoeppen wijt sullen brengen dan int verhueren bij alsoe dat die mumberen dat ghelt daer aff coemende amploeren ende beleggen tot oerbaer ende proeffijt vanden onmundegen kijnderen.
Actum 3-2-1571 nae scrijven van Gheeffen.
[achterzijde:] om hier aff te maken een certifficatie in meliori forma.