Mijn Studiezaal (inloggen)220.38 Index Beurzenstichtingen (220.38)
55a [VERVOLG AKTE] ende bijden eerbaeren ende discreten man Goeswijn genoempt Model van der Donck schiltknecht ter eere der heyligste maget Maria, Sinte Lenart ende Rumolt martelaeren ende Anthonis ende Eligius confessoiren nyen begifticht, daer aff inden openbaren instrument daer op gemaect ende by de hant ende teecken des openbaren Rutgers van Erp alias van Lieshout priester des voors. ludicx bisdom vuijt keyserlycke machte oipenbaer ende des hoefs van Ludick notaris ondergeschreven ende geteeckent ende bijden Eerwerdigen man Goyart van den Velde deken des consiliums van Woensel gelaudeert geratificeert ende geapprobeert ende geconfirmeert, om ten eeuwigen tijden te blyvenende dewelcke dese myne brieven syn doersteken wort gementioneert – Ende alle ende eenyegelycke inde selve geordineert begrepen ende genarreert in aller manieren ende formen, gelyck deselve sijn geordoneert ende begrypen – Ter bede des voors. gifters vuyt saecke van mijnen voors. pastoerschap der prochie kercke oft vierde capelle van Beke voirs. hebbe gelaudeert geratificeert ende geconsenteert ten eeuwigen dage te blijven – Bij alsoe nochtans dat mijn recht ende mijnder voirs. kercke ende eenyelijcx anders daer inne altijt blijve onvermindert – Gegeven onder mijn eijgen zegel in getuijgenisse van sgeens voirs. stadt hier aene gehangen inden jaere der geboerten ons Heeren dusent vier hondert twee ende twentich den achtententichsten dach der maent juny [197r] ende alle sijne goeden tegenwoerdich hebbende endde naemaels te vercrijgene in sekere ende goeden erffenissen oft plaetsen daer de tegenwoerdich rectoor vande voors. goeden oft sijne nacomelingen van rustelijck ende vredelijck mogen genieten , welcke voirs. renten die voirgenoemden Goeswijn geheten Model van der Donck Maria sijn wittige suster weduwe wilner Ghyselberts vanden Dooren, Weijndelmoet weduwe wilner Jans van der Donck syns broeders ende Heer Gerart van Eijcke pastoor der voirs. kercke van Beke mette brieven derselver renten ende
Vervolg:
metten geheelen recht hen daer inne ende inde voirs. brieven competerende tot behoeff der voirs. capelle oft altaer ende de rectoers desselve die ten tyde wesen sal, opgedragen hebben ende helmelinghe daer op vertegen, ende int geheel gerennuncieert hen geen recht inde voirs. brieven ende renten te behouden, met conditiën toegedaen dat so haest de voirs. capelle oft altaer als voors. is begifticht ende geconsacreert sal wesen die voirs. Goeswyn voer dierste reyse tot de voirs. capelle oft altaer den heere deken der plaetse offe dien deselve sal behoiren gepresenteert te worde eenen bequaemen persoon sal wesen sal presenteeren ende ten eeuwigen toecomenden tijde als de voirs. capelle ofte altaer sal geraecken te daceren [doceren?] sal de cannonick die besitter sal wesen van eenen acker gelegen inde prochien van Vechel des bisdoms voirs. nu totten voirs. Goeswyn geheten Model van der Donck behoirende gemeynlick genoempt Mostaertsacker totte voirs. capelle ofte altaer metten recht van patroon soe dickwils sulcx van noode sal wesen ende die vaceren eenen bequaemen persoon presenteren ende sculdich sijn te presenteren, hier inne oyck toegedaen dat de rectoor ten tijde der voors. capelle ofte altaer, in ofte op tzelve altaer alle weken ten eeuwigen toecomenden tyden sal celebreren ofte doen ende besorgen gecelebreert te worden twee missen ende so verre de rectoor ten tyde der voirs. missen oft eenich tijt int celebreren [198] van alsulcken missen versuymelyck waer, sal voer elcke misse alssoe als voirs. is versuijmt, geven ende sculdich syn te betaelen den besitter der voirs. acker tot behoeff vanden armen, eenen halven ouden grooten munte des Conincx van Vranckryck oft de werde daer voer in anderen payment, bijden selven besitter des voirs. ackers soo hem gelieven sal tot behoeff van alsulcken arme te bekeeren ende uyt te rycken – Gelovende in handen mijne notaris oepenbaer ondergeschreven by synen waerheijt in plaetse van eedt tzelve wittelyck stipulerende ende
Vervolg 2:
ontfangende van wegen ende inden name allen ende eenyegelycken daer toe geinyteresseert synde off die in toecomenden tyden daertoe geinteresseert sullen mogen wesen allet ende eenyghelijcken voirs. staet eeuwelicken vast ende stedich te hebben ende houden – Ende daertegens off ennige van dien nyet te comen directe oft indirecte int heijmelyck oft openbaerlick alle droch ende argelist hiermede vuytgescheijden dan allet welck des voirs. is die voirs. Goeswyn heeft begeert van mij notaris openbaer ondr geschreven tot behoeff des voirs. altaers ofte rectoers desselve een openbaer instrument gemaect te worden onder tgetuijchenisse vande bij staende persoonen dese dingen sijn gesciet binnen der stadt van sHertogenbossche inden huyse Goyaerts geneoempt Berwouts by de merct gelegen inden jaere, indictie, maent, dach, ure ende paeusdomme als boven, aldaer present seijnde Heer Dierick van Geldrop priester, Goessen geheten Uytenbergen, Aert genoempt Roever ende Peter genompt Udemans gelooffwerdige getuygen tot sgeens voirs. is te tuygen geroepen ende specialeken gebeden – onder staet geschreven aldus: Ende ick Rutger van Erp alias van Lieshout priester Ludicx bisdom oioenbaer ende der keyserlycke machte ende des …..woerdige Hoffs van Ludick geswooren notaris want ick alle ende eenyegelyck des voirs. is als deselve alsoe gescieden mette voirs. getuijgen tegenwoerdich hebbende [198r] Goijardt van den Velde deken des conciliums van Woenssel bisdoms van Ludick, doen kennelijkck eenen yegelicken die dese brieven sullen sien, dat wij de fundatie ende begiftinge der capelle ofte altaer gelegen ter plaetsen genoempt op die Donck inde prochie van Beke bij Aerle des bisdoms voors. ende byden eerbaren ende discreten man Goeswijn genoempt Model van der Donck schiltknecht ter eeren van de heylichste maget Marie Sinte Lenart endde Rumolt martelaren, Anthonous ende Eligius confessoiren nyeu gedoleert
Persoon in schepenakte:
Gerart van Eijcke
Dierick van Geldrop
Marie Sinte Lenart
Rutgers van Erp
Goyart van den Velde
Jans van der Donck
Rutger van Erp
Goijardt van den Velde
Datering:
6.5.1422 en 30.6.1422
Pagina:
195-198
Soort akte:
Testament
Plaats:
Beek en Donk / Aarle / Luik / Sint-Oedenrode / Helmond / 's-Hertogenbosch / Rosmalen / Erp / Lieshout / Woensel
Toegangsnummer:
220
Inventarisnummer:
Bron:
Beurzenstichtingen
1 gedigitaliseerd