Archieven

94 Extract oft clausulen getrocken ende gecopieert vuijt zeeckere codicille wijlen des Eerw: ende voorsienighen heere Heere ende Mr. Michiel Haller van Hallerstain priester, doctoir inden rechten, canonick der cathedrale kercke van Sint Jans Evangeliste binnen der stadt van sHertogenbossche ende der collegiale kercke van Sinte Oeden tot Roede des bisdoms van sHertogenbossche op den dertichsten dach der maendt augusti int jaer ons Heeren duijsent sesshondert ende twee gemaeckt ende gepaseert – Item ick laete ende maecke de somme van drije hondert gulden eens den gulden als voere tot twintich stuijvers gerekent, om die geappliceert te wordden aen een jaerlijcxe ende erffelycke rente van een ende twintich gulden tsiaers om daer mede alle jaere eene arme [335] eerlycke ende van wittigen bedde binnen der stadt van sHertogenbossche geboeren dochtere behulp ende onderstant te doene, om tot eenighen het zij geestelijcken oft weerlycken staet te helpen, waer van die nominatie ende provisie sullen hebben mijn heeren die deken van Sint Jans Evangeliste kercke ende die meester van den heijlighen geest binnen sHertogenbossche ten tijde wesende – Item insgelycx laete ende maecke ick gelijcke somme van drije hondert gulden eens, omme die oijck geappliceert te wordden aen een jaerlycxe ende erffelicke rente van een ende twintich gulden tsiaers om daer mede alle jaere een aerme eerlijcke ende van wittigen bedde binnen Sint Oeden Roede geboeren dochtere behulp rende onderstant te doene, om haer tot eenighen, het sij geestelijcken oft weerlijcken staet te helpen van welcke dochtere die nominatie ende presentatie hebben sullen die pastoir die voerschepen ende die outsten heijlige geestmeester van Roede voers. ende die provisie sullen hebben [335r] die voers. heere die deken ende die meester vanden heyligen geest van ‘sHertogenbossche