Archieven

4 ten gelieven der selve provisoren, welcke twee oude vrouwen gehouden sullen sijn altijt ter kercken te gaen twee dagen inde weecke te weeten swoensdaechs ende frijdaechs soo verre zij des enichsins connen doen ende aldair bidden voor de sielen des fondeurs daer aff dese voors. erffenisse is gecomen ende hen gegeven ende sullen de selve vroukens oock gehouden wesen soo veere iemant van hen beijden sieck ende cranck wordde ende eenigen dienst van doen hadde dat zij alsdan malcanderen sullen dienen ende in hennen noot bij staen soo veel hen mogelyck synde; item hebben die voors. Adriaen Goidtschalcx ende die vs. Alphonsa gemaeckt ende gegeven gelijck sij midts desen maecken ende geven midts desen tot onderhoudt ende reparatie des voorss. huijsken omme tselve inne behoorlycken reparatie te houden ende d’overschot van dijen allen jaer aende voors. vroukens inde vasten tot hennen nootdruft byden provisoiren beweesen ofte vuyt gereyckt te wordden, een jaerlijcke ende erffelijcke rente van twelff Car: gul: jaerlycx ierstmael te hebben ende te ontfangen op Onser Liever Vrouwen Lichtmisdach nae doot ende aflijvicheijt des voors. Alphensa ende alsoo dan voorts jaerlijcx van ende vuijt huijs ende hoff metten lande dair aen ende bij gelegen groot ontrent xxiiii lopen lants met noch seeckere verscheijden parceelen groeslants dair aen ende bij gelegen tvoors. huijs ende hof gelegen binnen de voorss. prochie ter voorss. plaetse beneven erffenisse de kynderen Henrick Laureijnss. Michielss. ter eenre ende Anthonis Zeberts Janss. ende de weduwe Henrick Bastiaens van Herpen ter andere sijde metten een eynde aen erffve Henrick Joachems ende de gemeynte aldair, streckende metten anderen eynde aen erffve des voirs. armhuijsken mette gemeijnte aldair met meer andere, behoudellick datmen de voors. renthe altijt sal mogen lossen metter summe van dryehondert gl. in premissengelde [vgl. permissiegelt] midts den losse een half jaer te voorens wittelick aende provisoren op te seggen,