Archieven

649 Wij Haenen en Kessel schepenen tot Grave bekennen mits desen dat voor ons schepenen voorschreven in properen persoon gecompareert en vurschenen is den edelen en voorsinnige Floris van Gale en heft bekent vuijt crachte van deesen dat hij gequeten en voldaen is van eenen scepenbrieff gevest vuijt den huijse nu toebehorend den jonge Willem Daems inhaldende en begrijpende sess malder rogge tjaars sekerende en gelovende den originalen bryeff van de voorschreven sess malder roggen in handen van de jonge Willem Daemss te leveren, alsoe dat Willem voorschreven of sijn erffen (in) gebrec sijnder daarvan gheene scade oft hynder meer aff ende sal overcomen, mar sall mits desen den selven brieff geheelicken sijn gelost en gequeten, ofte in gebrecke van dyen, soe voer scade, hynder oft intrest den voorschreven Willem of sijn erffen in toecomender tijden van diese mochten overgaan, geloof ic Floris voorgenoemd sulcx op mij en mijnne erffen denselve Willem voorschreven aff te vrijen en scadeloos te halden, doch soe ic Floris voorschreven desen brieff nu nyet en can becomen, geloeff ic sulx Willem Daemss voorgenoemd sulx in handen te leveren soe haest mijnen swager Bronckhorst tot Graeff coempt, mits conditien dat soe haest desen brieff Willem voorgenoemd verhantreijckt sall sijn, sal alsdan dit scepenscijn en Willems verwin op Gherijt van Perwis geworfen en verleent gedoodt en tenyet gedaen worden nyttemin soe lang sijner volcomen cracht halden en effectueren als nu. Sonder argelist. Memorie scepengeloefte: Perwes heeft geloeft te betaelen Floris van Gale de somme van 131 gulden en 5 stuiver tusschen dit en Vastelavont naestcomende of vuijt te peijnden en daarmede nyet te laet te comen. (zie ook scan 387).