Archieven

92 Aert soen wijlen Sijmon Gerits heeft erffelijck vercoft en opgedragen Gherit Jans van Boert een stuck beempts in de parochie van Beeck, op die Boerdonck, deen sijde dat gemeijn Waterlaet, dander sijde die weduwe Peter Emonts met haeren kijnderen, en dat een eijnd, dander eijnde den ghemeijn Dijck, los en vrij van alle commer te weeren. Item noch een stuck lands gelegen ten plaetse vs. deen sijde Beel Aert Joris, weduwe met haere kijnderen, dander sijde den ghemeijn wech, dat een eijnde de weduwe Peter Emonts met haere kijnderen, dander eijnde Wouter Peter Emonts te weeren los en vrij van alle voercommer en heeft daer helmelinge op vertegen als gewoenlijck.
Alzoe Aert Sijmon Gerits vercoft hadde Gerit Jans van Boert een stuck beemps en een stuck eckerlands gelegen in de parochie van Beeck, op die Boerdonck als dat in scepen brieven van Erp huijden op datum van desen gemaeckt breder verclaert is. Soe is gestaen voer ons scepen vs. die vs. Gherit en heeft openbaerlijck bekent en den selven Aerden, wederom geloeft als principael sculder op hem alle zijn goet dat Aert vercoeper sal moegen lossen en quijten die loss stucken erffs ten wijgen daegen op Lichtmisse met vijftich Carolus gulden xx stuivers voer den gulden ofte ander gelt nae deser valuatie met conditien dat hij te Korssmisse te voeren opseggen sal en dat lant tot september daer nae te verlaeten, oeck met conditien dat Gherit geen eijcken opgaend hout aff houden en sal. Datum anno xv twee en veertich den vi januarij. Testes Joerden Jans, Aert van Hout.