Archieven

202 Peter soen wijlen Wouter Peter Emonts, Peter Rutten als man en mombaer van Eertken sijnder huijsvrouw, Gerit Peter Coppens als man en mombaer van Geritken sijnder huijsvrouw, Thonis Theewen Willems als man en mombaer van Catherijnen sijnder huijsvrouw, alle dochteren van Wouter Peter Emonts, Anna en Lijsken oeck dochteren des voirs. Wouters met haeren vercozen mombaer hen naeden gewoenten daer aff gegeven, gelovende en hen sterck makende voer Jannen soene des voirs. Wouters hebben gesamderhant erffelick vercoft en opgedragen Lamberden Jans van Loeken, huijs, hoff en erffenis, deen sij die kijnder van Cauwenberch, dander sij Jacop Vogels, deen eijnt de erfgenamen Aert Jan Aelberts, dander eijnt die gemeijnt. Die cooper sal daer jaerlix vuijt gelden twee blancken gebuer chijns. Noch een Bosche malder roggen aldaer te leveren den genen diet met recht daer in heeft. Item noch huijs, hoff en erffenis daer aen, gelegen in der parochien van Erp, op Boerdonck, neven erffenis Jans van Loeken, coopere voirs. deen sij, dander sij en deen eijnt die gemijn straet, deen eijnt Jacop Vogels. Die cooper sall daer jaerlix vuijt gelden eenen braspenning gebuer chijns. Noch vier vaten roggen der maten van Erp den rectoer van der cappellen van Boerdonck. Noch der kerken van Rixtel jaerlix ii vaet roggen. Noch een stuck heijvelts gelegen in der parochien en plaetsen voirs. deen sij Michiel Jans, dander sij Hoebert Peters, deen eijnt die Erpse gemeijnt, dander eijnt die gemijnt van Lieshout. Noch het xii-ten gedeelte van twee bunder heijvelts gelegen in der parochien voirs. after die Boerdonxe cappellen, waer aff heeft Hoebert Peter Emonts oeck een xii-ten gedeelt en is tsamen gelegen neven Maes Hoeben deen sij, dander sijde Jan Hoerkens, deen eijnt die gemeijnt van Lieshout, dander eijnt die gemeijnt van Erp. Die cooper sal vuijten voirs. heijvelts jaerlix betalen een blanck chijns int boeck van den Boos.