Archieven

177 Jacob Hermens Mooren ende Trijn sijne huijsvrouw met haren gecoren momber etc hebben gevest Everart vander Heijden ende Catarina Crebber sijn huijsvrouw ende hueren erven een jaerrente van 18 gulden sjaers tot 20 stuver Brabants ideren gulden gerekent, te betalen alle jaren opten 18 januari daervan de eerste pacht verschenen sal sijn opten pachtdach voernoemd als men scrijven sal 1636 ende soo voorts etc. Vuijter een stuck lants groot ongeveerlick 3 mergen aen den Crommendijck gelegen metter eenre sijde beneven erve van de erfgenamen Hermen Gerits, d’ander sijde beneven Peeter Peeters, schietende metten eenen eijnde op erve van voirschreven erfgenamen ende metten lesten eijnde op den dijck; noch vuijtter huijs ende hoffstadt aen ’t Cleijn Ven gelegen metter eener sijde beneven Laureijns Dericx, d’ander sijde d’erffgenamen Gertgen Smits erf, voorhoofs aen de straete ende achter aen de erve van Gielen Rommen zaligererf. Ende voorts vuijt alle goet gereet en ongereet onder dese gerichte gelegen, ende is vrij erf, vuijtgenomen een half malder rogge drientwintichstenhalven stuver thijns ofte pontgelt, idem te lossen met 300 gelijcke guldens met de onbetaelde pachten daerbij ende malcanderen de losse een vierendeel jaer van te vorens op te seggen. Actum voer Willem Tijssen ende den voirschreven Jacob Hermens Mooren heijmraden.