Archieven

267 Wij Sebert Claess ende Willem Sebertss, Scepenen, tugen dat voir ons comen is PETERKEN VAN GREVENBROECK, ende heeft met consent ZIEGER hoirs soens ende GEERTRUIJT hoere dochter, verhuert JANNEN HENRICXZ, de helfft van hoeren hoff gelegen inder prochie van MEGEN, beneven de BUIJTEN STRAET, deen sijde ende dander sijde beneven erve Henrick Jacops, mette wal ende appelbomen dair op staende, te weeten den hoff soe verre als hij nu geert is te deijlen overmidsen, te lancx doer, dair aff Jan Henricxz hebben sal de helffte naest Henrick Jacops erve, ende Peter sal hebben dander helft naesten straet, ende den wal sullen sij deijlen over dwers, ende elck een eijndt, ende vanden appelbomen sullen sij het gebruijck halff ende halff hebben, elff jaeren lanck duerende, aengaende nu Kersmisse anno tweenveertich, dair voir Jan Henricxz de voirs. Peterken aff doen ende betalen sall aen WILLEM MAESS tot HAREN, nu Megensche kermesse naestcomende, elff rijnsgulden, die Peterken den voirs. Willem schuldich is, ende noch een malder gersten Jan Henricxz voirs. der voirs. Peterken greet gegeven heeft inden sack. Mits welcken elff gulden ende malder gersten voirs. Peterken voirs. voir hoir ende hoeren erven bekent vernuecht ende betaelt te sijn, tsamen ende geheel vande huer ende pachten der voirs. elff jaeren. Ende geloift Peterken voirs. op hoir ende allen hoir goet, hebbende ende vercrijgende, den voirs. Jan Henricx de huer te hauden den voirs. jairen, tsij sij is levendich off doot, ende den voirs. halven hoff te weeren vrij, ende alle commer ende lasten opten voirs. hoff sijnde ende op comen machte, voirts oeck den voirs. hoff te heijmen ende te thuijnen, ende den dijck tonderhalden, ende dier gelijcke lasten, allet op hoiren cast ende last, te betalen ende te dragen, dair Jan Henricxz schaij noch hijnder bij hebben en sal, ende hem de schair ende schooff dair aff vrij op ende aff leveren den voirs. jaeren duerende, sonder argelist.
Actum anno XLII, den XVIen novembris.