Cathalyn verklaart 'dat IJeffken weduwe Dirck Aert Smits geloeft hadde te geven Dirick Otters in houwelycxer voerwaerden met Elisabeth zyn huysvrouw, dochter van Dirick Aert Smits eens de somme van vyftich gulden, welcke vijftich gulden die voerscreven Dierck oyck van haer begerden te hebben. Ende mits dien dat IJeffken daer qualyck raet toe wiste, versochte aen Jan Dirck Aert Smits, die welck dyer tyt momboer was over den onmundigen kynderen van Frans Aert Smits, ende van der selver kynderen gelt was hebbende, dat hy voer der voerscreven IJeffken wegen aen Dircken Otters dese vijftich gulden van der selver kynderen gelt wilde schieten. Ende dat IJeffken sprack, sy soudt maecken in haeren testament dat die kynderen van Frans Aert Smits dese vijftich gulden wederom souden vijnden aan des voerscreven Dircx huysvrouw kijntsgedeelt.
Ende dat haer deponenten oick wel kennelyck is dat Jan Dirck Aert Smits dese vijftich gulden ten versuecke van Ieffken voerscreven heeft geschoten ende getelt aen Dirck Otters voerscreven. Noch dat haer deponenten wel kennelyck is dat ten tijden doen IJeffeken voerscreven sieck te bedde lach ende ontfinck de sacramenten der heyligen kecken, dat zy daer by ende aen is geweest,
De voerscreven Catelijn seggende redenen haerder welwetenheyt day zy dier tyt woonden by Jan Dirck Aert Smts, tot wiens huyse de voerscreven IJeffken is gestorven, ende zy deponente daer voer IJeffken dicwils hadde vermaent, dat sy doch maecken soude, dat die kynderen van Frans Aert Smits dese vijftich gulden wederom souden hebben.
Ende de voerscreven heer Roeloff, pastor, tuycht warachtich te zyne dat ten tyde doen IJeffelyken voerscreven sieck te bedde lach, hy der selver IJeffken heeft geadministreert de sacramenten der heyligen kercken, ende dat IJeffken doen begeerden in haeren testamente dat de vyftich gulden die welck Jan Dirck Aert Smits gescoten ende getelt had van wegen Yeffken voersscreven aen Dirck Otters, souden in Diricx huysvrouw kyntsgedeelt blyven staen, ende daer aff betaelen den jaerlycxen pacht aen den kynderen van Frans Aert Smits. Oft dat Dierck voerscreven in de deylinge soe lange sude stil staen, dan die kynderen van Dierck Aert Smits elck hooft voer hooft soe goeden vyftich gulden daer tegens hadden.
Getuigen: Huybert Willems, Mathys Danels, Joris Gerits, Peter Gijsberts, Willem Jans en Gerit Ariens, scepenen