Archieven

267 Wij Sebert Claess ende Willem Sebertss, Scepenen, tugen dat voir ons comen is PETERKEN VAN GREVENBROECK, ende heeft met consent ZIEGER hoirs soens ende GEERTRUIJT hoere dochter, verhuert JANNEN HENRICXZ, de helfft van hoeren hoff gelegen inder prochie van MEGEN, beneven de BUIJTEN STRAET, deen sijde ende dander sijde beneven erve Henrick Jacops, mette wal ende appelbomen dair op staende, te weeten den hoff soe verre als hij nu geert is te deijlen overmidsen, te lancx doer, dair aff Jan Henricxz hebben sal de helffte naest Henrick Jacops erve, ende Peter sal hebben dander helft naesten straet, ende den wal sullen sij deijlen over dwers, ende elck een eijndt, ende vanden appelbomen sullen sij het gebruijck halff ende halff hebben, elff jaeren lanck duerende, aengaende nu Kersmisse anno tweenveertich, dair voir Jan Henricxz de voirs. Peterken aff doen ende betalen sall aen WILLEM MAESS tot HAREN, nu Megensche kermesse naestcomende, elff rijnsgulden, die Peterken den voirs. Willem schuldich is, ende noch een malder gersten Jan Henricxz voirs. der voirs. Peterken greet gegeven heeft inden sack. Mits welcken elff gulden ende malder gersten voirs. Peterken voirs. voir hoir ende hoeren erven bekent vernuecht ende betaelt te sijn, tsamen ende geheel vande huer ende pachten der voirs. elff jaeren. Ende geloift Peterken voirs. op hoir ende allen hoir goet, hebbende ende vercrijgende, den voirs. Jan Henricx de huer te hauden den voirs. jairen, tsij sij is levendich off doot, ende den voirs. halven hoff te weeren vrij, ende alle commer ende lasten opten voirs. hoff sijnde ende op comen machte, voirts oeck den voirs. hoff te heijmen ende te thuijnen, ende den dijck tonderhalden, ende dier gelijcke lasten, allet op hoiren cast ende last, te betalen ende te dragen, dair Jan Henricxz schaij noch hijnder bij hebben en sal, ende hem de schair ende schooff dair aff vrij op ende aff leveren den voirs. jaeren duerende, sonder argelist.
Actum anno XLII, den XVIen novembris.

266 Wij Goirt van Mameren ende Willem Seberts, Scepenen, tugen dat voir ons comen is HENRICK BERNT HENRICXZ., ende heeft bekent schuldich te sijn erffelick ende alle jair GOIRDEN JANSS VAN OSS, eenen gulden, twintich stuver voirden gulden, wair aff den iersten taeldach sijn sal over een jaer nae deesen, ende soe voirt alle jair, wt sijn kijnts gedeelte van een stuck erffs geheijten den GAETACKER, noch ongescheijden ende ongedeijlt, deen sijde Jan Mercelis erffgen., dander sijde Jan Goessens den jonge, deen eijndt de Meir steeg, dander eijndt Jan de Paz, ende voirt wt alles goits dat Henrick voirs. heeft ende vercrijgen mach, wt te peijnden alle jair gelijck verwonnen schult. Op conditie dat hijt altijt lossen mach als hijt ierst een veirdel jairs, te voiren opseeght met vijffthien gulden ende metten pacht, twintich stuver voirden gulden.
Actum op St. Bamis dach anno XLII.

265 Wij Sebert Claess ende Herman Botterman, Scepenen, tugen dat voir ons comen is DIRICK PEEL, ende heeft bekent schuldich te sijn van gerechter wittiger schult, ende gelooft op hem ende op sijn huijs ende hoffstadt gelegen binnen MEGEN dair hij woent, ende voirts op alles goits dat hij heeft ende vercrijgen mach, van nu op datum van deesen over vier jaeren te betalen LENAIRT HENRICXZ DE BRAUWER ende CORNELIS ROELOFSZ, de somme van achtenveertich Carolus gulden tot twintich stuver tstuck, wt te peijnden etc.
Actum anno XLII, op St. Mathijs avont.

263 Coram eisden is comen JAN REIJNDERSS VAN CUIJCK, ende heeft bekent schuldich te sijn erffelick ende alle jair MEUS VAN KEEKEN, twe gulden, twintich stuver brabants gevaluweert voir elcken gulden, wair aff den iersten taeldach sijn sal opten Heijligen Paessdach nae datum van deesen, ende soe voirt alle jair, wt sijn helft van een stuck erffs gelegen inden MEGENSCHEN HAM, opte LIJM, deen sijde Sebert Claes, dander sijde Henrick van Gendt, deen eijndt den Creijen dijck, dander eijndt Alairt van Deijsen, ende voirt wt alles goits dat hij heeft ende vercrijgen mach, wt te peijnden gelijck verwonnen schult. Op conditie dat hijt altijt lossen mach in twe termijnen, elck termijn met sesthien gulden, ende metten pacht, twintich stuver brabants gevaluweert voir elcken gulden.
Actum anno XLII, den VIIIen julij.
Kantl.: Deesen brieff ende den inhalt van deses is bij Lijntken Arndt Vossen gequeten aen Mr. Wiltem Moelengraeff. Present Jan Peters ende Gerit Cloppers, Schepenen opten Vlten junij 1606.