Archieven

262 Coram eisden is comen JAN DE BECKER, ende heeft bekent ende beleeden hoe dat hij den camp genoempt den DIJSTELCAMP vanden Heijlige Geest meesters van Megen gepacht heeft inden naem ende tot behoeff GOESSEN VAN LOOKEN ende HENRICK BORKENS tot BERCHEN, ende geeft Jan voirs. den voirs. Goessen ende Henrick de voirs. huer over inder selver maeten soe hijt gehuert heeft, daer aff dierste jair aengaen sal, nu Kersmisse naestcomende, ende des hebben Goessen ende Henrick voirs. gelooft op hon ende op alle honne gueden, Jannen voirs. daer aff schadeloos te houden.
Actum anno XLII, den XVIen julij.

261 Wij Sebert Claess ende Willem Seberts, Scepenen, tugen dat voir ons comen is JAN HEIJCKMAN, gaende ende staende op sHeeren straeten, ende heeft gemact ende mits deesen scepenen brieff mact MECHTELT JAN BERWERS dochter, sijnder huijsvrouwen, om menigen trouwen dienst sij hem bewesen heeft ende dagelicx bewijsende is, vier gulden jairlicx, aengaende nae sijn doot ende hoir leven lanck duerende, ende nijet langer, wt allen sijn gueden die hij nae sijn doot achter laeten sal ende noch sijn helft van huijs ende hoff dair hij woent, een jair lanck nae sijn doot te gebruijcken, ende noch alsulcke garst schair indien hij nu afflivich wordt als nu staet op een stuck erffs genuempt Gerit Dircixz weert. Ende Mechtelt voirs. mach wtpeijnden alle jair nae doot Jans voirs., de voirs. vier gulden aen alle gueden, reede ende erve als hij achter laeten sal, als se hult die met allen rechten verwonnen weer, allet sonder argelist.
Actum anno XLII, den XXVIen junij.

260 Coram eisden is comen HILLEKEN VAN DRUETEN, ende heeft bekent schuldich te sijn erffelick ende alle jair PETEREN CUIJSTEN ende GOIRDEN VAN MAMEREN, Heijlige Geest meesteren tot Megen, tot behoeff des Heijlige Geest voirs., eenen gulden, twintich stuver voirden gulden, wair aff den iersten taeldach sijn sal opten Heijligen Kersdach nae datum van deesen, ende soe voirt alle jair, wt hoir helfft van huijs ende hoff gelegen binnen MEGEN, daer sij woent, deen sijde Lijsken Jan Berwers huijsvrou met hoiren kijnderen, dander sijde Hadewich van Mameren met hoiren kijnderen, deen eijndt de gemeijn straet, dander sijde den winterdijck, ende voirt wt alles goets dat Jan voirs. heeft ende vercrijgen mach, wt te peijnden gelijck verwonnen schult. Op conditie dat sijt altijt lossen mach met vijffthien gulden ende metten pacht, twintich stuver voirden gulden.
Actum anno XLI, opten Heijligen Kersdach.

259 Wij Gerit Jan Roeloffsz ende Herman Botterman, Scepenen, tugen dat voir ons comen is LAMBERT WIJERSS DEN CUIJPER, ende heeft bekent schuldich te sijn erffelick ende alle jair LIJSKEN MAES DE CAELS dochter, thien stuver, wair aff den iersten taeldach sijn sal op Onser Liever Vrouwen dach Visitationis nae datum van deesen, ende soe voirt alle jair, wt huijs ende hoff gelegen binnen MEGEN tegen de CAPEL over, deen sijde ende deen eijndt Neesken Ariaens van Hemerts dochter, dander sijde Meus de Ketelbueter, dander eijndt de gemeijn straet, ende voirt wt alles goets dat Lambert voirs. heeft ende vercrijgen mach, wt te peijnden jair gelijck verwonnen schult. Op conditie dat hijt altijt nae drie jaeren lossen mach als hijt ierst een halff jair te voiren opseeght met achtenhalven gulden ende metten pacht, twintich stuver brabants gevaluweert voir elcken gulden. Ende mede op conditie als Lijsken nae drie jairen een halff jair , te voiren opseeght dat hijt dan lossen moet gelijck voirs.
Actum anno XLII, op Onser Liever Vrouwendach Visitationis.