Archieven

195 Jan Lambertssen van Oerle de helft van een jaerlycke ende erffelycke losrente van een hondert Ca: gulden ten laste der heeren staeten van Brabant int quartiere van sHertogenbossche te vergelden, staende d’eene helft verschijnende den dertthienden november ende d’andere helft den derthienden may welcke voors. rente Arnt van Sellaer tegen den voors. heeren Staten van Brabant in coop vercregen hadde ende daer naer Peeter Elverdonck Dircxssen als wittich man ende mombor [vgl. momboir] van Cristina van Sellaer erffelycken opgedragen hadde den voors. Jannen van Oerle gelyck in scepenen brieven der stadt van ‘sHertogenbossche daerop gemaeckt breede begrepen stet van date den 28 dach der mandt [vgl. maand] int jaer ons heeren duijsent vyffhondert sesentnegentich heeft hy wittelyck ende erffelyck opgedragen ende overgegeven Geraerden van Broechoven soone meester Hendrick van Broechoven des rentmeester der heeren Staten van Brabant ende Raedt deser stadt van sHertogenbossche tot behoeff vande fondatie van seeckere beurse byden Rentmeester Broechoven alreede daerop gemackt ende alnoch te maecken, tesamen mette voors. brieven ende metter alinge recht hem ende voors. brieven ende den innehouden van dyen eenichsins competerende, ende metten achterstel van twee jaeren in novembri toecomende daeraff te vervallen ende heeft helmelinge daerop vertegen in manieren in dyen gewoonlyck zynde – Gelovende die oors. Jan van Oerle als schuldenaer principael onder verbant van syn persoon ende alle syne goeden hebbende ende vercrijgende t’voors. opdragen overgeven ende vertyden altyt vast stedich ende van werden te houden sonder enich wederseggen ende allen commer calangie ende aentael van synen wegen inde voors. helft deer voors .rente wesende oft comende in de fondatie der beurse voors. aff te doen geheelycken – Getuijgen waeren hier over schepenen in sHertogenbossche Mathijs….meer ende Willem Oliviers;