Wij Andries Ansems ende Willem Andries schepenen in Vessem tuijgen onder onse segelen dat voir ons coemen is Jan Gysbrechts ende heeft geloeft geloeft jaerlycx ende erffelycx te gelden ende te betaelen Heer Adriaen van den Dijck ter cause van tweehondert gulden twelff gulden tsiaers op Lichtmisdach, waer aff den yersten paecht is verschenen Lichtmis lestleden, ende soe den paecht binnen de sesweken vanden verschynsdach wordt betaelt, maech gestaen met thien gulden, hier voir verobligerende huijs hooff ende erffenissen daer aen gelegen, inder prochien van Vesse, deen syde ende een eynde aen erve Henrick Wirix, dander syde aen erve Jacob van Boemel dander aende gemeynte, noch uyt eenen beempt genaempt den Cort Broeckbeempt gelegen inder prochienvoirs., deen syde aen erve Wouter Sprincen dander syde aen erve Peter Rykers ende Jan van Riel, deen eynde aende Aa, dander eynde aende Straete – Geloevende die voirs. Jan de voirs. rente inde onderpanden te weren soemen erve met recht schuldich is te weren ende daer voir altyt goet ende welduegende te maecken – Gegeven int jaer ons Heeren sesthienhondert ende tweeentwintich den neghenthiensten in september, ende was besegelt met twee uijthangende segelen in groenen wassche in dobbele sterte van parckement – gecollationeert jegens syn principael is dese copie daer mede bevonden t’accorderen - quod attestor – loco secretarij G.L. van Ghestel [1652]
Wij Lybrecht van Hove ende Aert Gielens schepenen in Vessem tuijghen onder onse segelen dat voir ons comen Michiel Anthonis vanden Hagelaer heeft gelooft jaerlijkx ende erffelijckx te gelden ende te betalen ter cause van twee hondert guldens den gulden tot twintich stuijvers gerekent Handricken Goijaerts de Crom, Jan Janssen van Haudt ende Lenaert Elias Schilders ende Jorden Janssen van Hersel alle jaer op Lichtmisdach de pacht daer aff thien gulden tjaers waer aff den iersten pacht sal verschijnen Lichtmis toecomende uijt huijs hoff ende erffenis daer aen gelegen inder prochie van Vessem, deen sijde beneven erffenis der pasterije [lees”pastorije] dander sijde aen erfve Andries Anssems ende Willem van Hove deen eynde aen erfve Willem Andriesen dander eynde aende gemeynte gelovende die voors. Michiel die voors. rente van thien gulden jaers inde voors. onderpanden te weren en daer voir altijt goet ende wel deugende te maecken daer voir verobligerende synen persoen ende goederen nu hebbende ende vercrygende – gegeven int jaer ons Heeren geboorte duijsent ses hondert vijff ende twintich den thienden december – onderteeckent G.Mijss. secretaris 1630 ende besegelt met twee uijthangende segelen in groenen wassche in dobbelen sterte van parchkement – Concoediam huius copie attestor – loco secretarij G.L. van Ghestel [1652]
Wij Andries Ansems ende Willems Andries schepenen in Vessem tuijgen onder onse segelen dat voir ons comen is Delis Claus, eest [lees: heeft] geloeft ter cause van drie hondert gulden Heer Adriaen van den Dijck alle jaer op Lichtmis dach aechthien gulden, ende betaelende binnen de des weken naeden verschijndach sal aende aechtien gulden corten drie gulden, hier voir stellende tot onderpanden huijs hooft ende erffenissen daer aen gelegen inden prochien van Vessem, deen sijde daert aff is gedeijlt met Merten Aert Bersmans, dander sijde aen erve Dirick Peters, deen eynde aen erve Michiel van Boemel, dander eynde aende gemeijnte, waeraff den yersten pacht sal verschijnen Lichtmis toecomende – Geloevende die voorschreven Delis op synen persoen ende goederen nu hebbende ende vercrijgende, de voirschreven rente inde londerpanden te weren ende daer voir goet ende welduegende te naken. Gegegeven int jaer ons Heeren sesthienhondert ende tweeentwintich den negentiensten dach in september ende was besegelt met twee uijthangende segelen in groenen wassche in dobbelen sterte van parckement.
Gecollationeert jegens den principaele is dese copie daer mede bevonden t’accorderen – quod attestor loco secretarij G.L. van Ghestel [1652]