Te wetene dat voer ons scepenen gecompareert zyn die vrienden ende magen des dooden, namelyck Meeus Jan Meeus ende Aert Jan Willem Houbrakens als momboren gestelt over die aftergelaten kynderen Thomas Jacops afflivige met veel met vrienden ende magen ter eenre, ende Peter Ariens, Peter Jans ende Claes Ariens met andere vrienden in den naeme van Jan Jan Ariens misdedige ter andere syden. Ende hebben hen parthyen, te weten die voorscreven vrienden ende magen des dooden voerscreven ter eenre zyden gesubmiteert in den eersamen wysen ende voersienigen mannen Jan Jan Alaerts ende Peter Roeloff Henricx. Ende Peter Ariens, Peter Jans ende Claes Ariens in den naeme Jan Jan Ariens misdedige in den eersamen wysen ende voersienige mannen te weten Mathys Arts ende Pauwels Janss. Gelovende dese parthyen op eenen peen van VI gulden by scepenen daer pregeordineert die wtsprake der voerscreven arbyteren te achtervolgen ende nae te gaen. Ende voert gelovende op soenen recht ende op soenen broken, voer geboren ende ongeboren, voer mundige ende onmundige, voert alle die gene die hen ten thiende lede bestaen mochten dese tegenwoordige erffsoene ten euwigen toecomende tyden vast ende stedich te houden, sonder enich wederseggen, zoe die by den arbyeteren te beyde zyden ende rechterlyck wygesproken sal worden.
- In den iersten zal Jan misdedige voergenoemt geven den onmundigen kynderen aftergelaten van Thomas Jacops zaliger tot onderstant ende alimentatie der selve tsestich carolus gulden, stuck van XX stuyvers, te betalen nu te Lichtmisse dach naestcomende. Ende voer dese penningen soe syn borge geworden Willem Jan Peters ende Willem Corst Aerts.
- Noch sal Jan misdedige geven voer die costen die by de vrienden des dooden op ten gerechten soendach gedaen sullen worden twentich carolus gulden.
- Moch sal Jan misdedige geven zess carolus gulden als voert voetgevall ende ’t gene dat men den armen geven sall.
- Noch sal Jan misdedige gaen een bevaert voer dat Heilich Sacrament tot Boxtel tot laeffenis der zyelen des dooden.
- Noch sal hy offeren een wassen kersse van eenen ponde voer dat Heylich Cruys binnen der kercken van Vechell, ende sal altijt voer die zyele des dooden Godt bidden
- Noch sal Jan misdedige blyven vuyter prochie van Vechel twee jaeren lanck ende daer nyet te verkeeren dan gastgewys.
- Noch sal hy den vrienden des dooden altyt den wech schouwen soe verre hem dat te voren kennelyck is.
- Noch sal Jan misdedige comen voer by die vrienden des dooden ende bidden hen oetmoedelyck vergiffenisse ende alsdan ist vergeven.'
Getuigen: Jan Peter Thielens en Huybert Willem Jans, scepenen